دسمبر میں آگ برساتی یادیں 20

دسمبر میں آگ برساتی یادیں۔

                                                                                                                            دسمبر کا مہینہ اہل اسلام بالخصوص اہل پاکستان کے زخموں پر نمک چھڑکتے ہوئے گزرتا ہے اس سال اچانک 15دسمبر کو سردی اور دھند کا اندھیرا بڑھا تو  دوسری طرف تاریخ نے دل میں ایک آگ بھڑکا دی باہر ٹھنڈک بڑھتی جا رہی تھی اور اندر اداسی، باہر سردی بڑھتی جا رہی ہے اور اندر ۔ ۔ ۔ اندر تو جیسے آگ بھڑک رہی ہو اور اللہ کریں یہ آگ ہر مسلم کے دل میں بھڑکے کیونکہ یہی آگ زندگی اور ہمت دیتی ہے ہمیں اپنے ماضی سے سبق سیکھنے کا پیغام دیتی ہے کیونکہ"جو اپنے ماضی کی غلطیاں یاد نہیں رکھتے وہ مستقبل میں انھیں دہراتے ہیں"

                                                                                                                                اگر ماضی میں ہم سقوط بغداداورسقوط غرناطہ کو یاد رکھتے اس سے سبق سیکھتے تو شائد ہمیں آج دسمبر 1971 یاد کر کے آنکھیں پرنم نہ کرنی پڑتیں کہ جب ایک نظریاتی مملکت کو دو لخت کر دیا گیا تھا لیکن کیا وہ نظریہ بھی پاش پاش ہو سکا تھا جس نظریہ پر مشرقی اور مغربی ہاکستان کے مسلمانوں نے مل کر قربانیوں کی لمبی داستان رقم کر کے پاکستان حاصل کیا تھا؟

             یقیناً نہیں ۔۔۔درحقیقت سانحہ تو یہ تھا کہ اس گھناؤنی سازش اور تعفن زدہ کوتاہی میں ”ہمارے اپنے“شریک تھے، سقوطِ بغداد کی طرح، سقوطِ غرناطہ کی طرح۔تاریخ پاکستان کا سب سے بڑا سانحہ سقوط ڈھاکہ ہے کہ جب ہماری بندوقوں سے ہماری اپنی مائیں بیوہ ہوئیں ،خوبصورت اور رعنا جوان جنھیں مسلمانوں کی مدد کرتے ہوئے جان دینا تھی وہ اپنے مسلم بھائیوں کی گولیوں کا نشانہ بنے آج بھی وہ معصوم بہنیں نوحہ کناں ہیں جو بھائیوں کی لڑائی میں بے آبرو ہوگئیں۔اس سانحہ پر جب آگ اور گائے کے پجاری فخریہ بھڑکیں مار رہے تھے

                                                                                                                                                                                                                                                                                                                عمر بن خطاب ؓ کی روح کتنی آبدیدہ ہوئی ہوگی؟؟جب بھارتی ریڈیو سے مندروں کے پجاری تقسیم پاکستان اور نظریہ اسلام نظریہ پاکستان کو خلیج بنگال میں ڈبونے کی نوید سنا رہے تھے اس وقت محمود غزنوی کی روح کتنی تڑپی ہوگی؟؟؟

                                                                                                                        آج بھی ڈھاکہ کی جامع مسجد بیت المکرم کعبۃ اللہ سے سوال کر رہی ہے کہ میرا قصور کیا تھا جو مجھےمسلمانوں نے ہی بے آبرو کیا؟؟؟یہ سانحہ اتنا بڑا تھا کہ ہم اگر رونے لگیں تو شائد ہمارے آنسو اس کی سیاہی نہ دھو سکیں مگراب  ماضی کو یاد  کر کے آنسوبہانے کے ساتھ ان اسباب کو جان کر ان کا سدباب کرنا بھی  ازحد ضروری ہے تاکہ ہماری آنے والی نسلوں کو کسی نئے سانحہ پر آنسو نہ بہانے پڑیں کیونکہ آج بھی ہم اسی روش پر ہیں جس شاہراہ پر ہمارے بھائی ہم سے جدا ہوگئے۔

محبت گولیوں سے بو رہے ہو

وطن کا چہرہ خون سے دھو رہے ہو

گماں تم کو کہ رستہ کٹ رہا ہے

یقیں مجھ کو کہ منزل کھو رہے ہو

                                                                                        اگر ہم سقوط ڈھاکہ کو کسی ایک سیاسی جماعت یا عہدیدار کے ساتھ منسوب کریں تو یہ اس حادثہ کے ساتھ ہی ذیادتی ہوگی کیونکہ!

وقت کرتا ہے پرورش برسوں

حادثہ ایک دم نہیں ہوتا

                                                                                                                                                                                                                        دراصل جس نعرے اور نظریہ پر برصغیر کے مسلمان یکجاء ہوئے تھے ہم 1947ء کے بعد رفتہ رفتہ اس کو بھول چکے تھے۔ دو قومی نظریہ نے مسلمانوں کی آپس کی ساری تفریقات ختم کر کے صرف ایک تفریق باقی رکھی اور وہ مسلم غیر مسلم کی تھی جس سے علاقائی،لسانی اور صوبائی تعصبات ختم ہوچکے تھے۔مشرقی اور مغربی بازو جس جسم کے سارٓتھ مل کر یکجان ہوئے وہ نظریہ اسلام ہی تھا ۔ مگر قیام پاکستان کے بعد بعض نا عاقبت اندیش اور مفاد پرست لوگوں نے جب مذہب اور ریاست کے باہمی تعلق کو درست نہ سمجھا اور پاکستان کے اپنے اپنے ایجنڈے کے مطابق قومی ریاست بنانے کی تگ و دو شروع کر دی جب کہ پاکستان میں ایک نسل،زبان یا قوم کے لوگ نہیں بستے اہل پاکستان کو صرف اسلام نے یکجاء رکھا تھا جب ہم نے مذہب کو رخصت کیا تو یہ وحدت بھی رخصت ہوگئی اور ہر نسل،قوم علاقہ اور زبان کے لوگوں نے کھینچا تانی شروع کر دی۔بنگالی و غیر بنگالی،مشرقی و مغربی،عوامی کی تفریق شروع کر کے قوم پرست لوگوں کو انتشار پر ابھارا گیا۔ بالآخر اقبال کے خواب دو ٹکڑوں میں تقسیم ہوگیا۔

"دھڑبھی دوہوگئے دربھی دوہوگئے،

       جیسے کوئی بھی رشتہ ہمارانہیں"

                                                                                                                                                                                                                                                                                                                مشرقی پاکستان کی سیاسی پارٹیاں غریبوں کا سہارا لے کر مضبوط ہو رہی تھیں تو مغربی پاکستان میں جاگیردار اور سرمایہ دار روٹی کپڑا مکان کا نعرہ لگا کر تقویت حاصل کر رہے تھے۔ایک طرف مجیب الرحمٰن کی عوامی لیگ کی طرف سے سوشلزم کا نعرہ بلند ہو رہا تھا تو بھا شانی گروپ سرخ انقلاب کے نعر ے لگاکر انتخابات پر یقین نہ رکھتاتھا۔دوسری طرف مغربی پاکستان کے سیاستدان جن کو اپنی جاگیروں اور سرمایہ کی فکر تھی کہ اگر  بنگالیوں کی حکومت آگئی تو ہماری جاگیریں ختم نہ ہوجائیں۔یہ وہ اسباب اور جاہلیت کے نعرے تھے جنھوں نے بھائی کو بھائی سے جدا کر دیا تھا وگرنہ ہم سب نےمل کر پاکستان بنانے کی قربانیاں دیں تھیں اور آج بھی اسلام پسند بنگلہ دیشی اور پاکستانیوں کے دل ایک ساتھ دھڑکتے ہیں۔

عداوتیں تھیں، تغافل تھا، رنجشیں تھیں بہت

بچھڑنے والے میں سب کچھ تھا، بے وفائی نہ تھی

بچھڑتے وقت ان آنکھوں میں تھی ہماری غزل

غزل بھی وہ جو کسی کو ابھی سنائی نہ تھی

کسے پکار رہا تھا وہ ڈوبتا ہوا دن

صدا تو آئی تھی لیکن کوئی دہائی نہ تھی

کبھی یہ حال کہ دونوں میں یک دلی تھی بہت

کبھی یہ مرحلہ جیسے کہ آشنائی نہ تھی

                                                                                                                                                                                                                                                                                                سقوط ڈھاکہ کے ایک سبب یہ بھی تھا کہ ہم نے دشمن کو دشمن نہ سمجھ۔ ہم جس قوم سے جان چھڑانے کےلیے لاکھوں قربانیاں دے کر پاکستان قائم کرنے میں کامیاب ہوئے تھے بنگال کے سکولز میں وہی اساتذہ ہمارے کچے ذہن پودوں کو رنگ،نسل ،ذات برادری اور مادیت پرستی کی تعلیم دے رہے تھے جس کا خمیازہ ہم نے بھگتنا ہی تھا اور وہ سقوط ڈھاکہ کی شکل میں رونما ہوا۔

                                                                                                                                                                                                                                                                                                                                                                                                                                        ہمارے جتنے بھی مؤرخین سقوط ڈھاکہ کے زخم تازہ کرتے ہیں وہ آغاز اور اختتام ایک ہی آنسو پر کرتے ہیں کہ اس میں ہندوؤں کی بہت بڑی سازش تھی اس بات میں کوئی شک نہیں مگر میں اس بات کا قائل ہوں کہ"الزام دوسروں کو دینے کی بجائے خود کو دو" غیر آپ کے گھر اسی وقت حملہ کرتا جب اسے محسوس ہو آپ سو رہے ہیں۔جب آپ اندرونی طور پر خلفشار کا شکار ہوں  سیاسی استحکام نا ہو تو دشمن فائدہ بھی اٹھائے گا اور آپ کےقلعہ کی مضبوط دیوار کو  گھونسلہ سمجھ کر نقب زنی بھی کرے گا ۔ہم کیوں روئیں کہ بھارت نے یہ کیا کیونکہ وہ ہمارا دشمن ہے اور دشمن دشمنی ہی کرتا ہے وہ ایسا  نہ کرے دوشمن کیسے بنے۔

مجھے رہزنوں سے گلہ نہیں تیری رہبری کا سوال ہے

                                                                                                    ان سب وجوہات میں سب سے اہم  وجہ وہ تھی جو ہم نے اپنے خالق سے کیے گئے وعدے کی خلاف ورزی کی پھر تقدیر نے ہمیں سبق سکھایا۔دنیا کا قانون ہے کہ جب آپ کو کسی جگہ کسی دشمن سے خطرہ ہو آپ اپنی کمپنی یا فیکٹری کے مالک کو راضی کر کے اس کی تائید اور نصرت حاصل کرتے ہیں اسی طرح قسمت کو سنوارنے کے لیے مالک کو راضی کرنا ضروری ہے مالک راضی ہوجائے پھر ترقی سے کوئی روک نہیں سکتا اور اگر  مالک راضی نہ ہو پھرکوئی اسلحہ،فوج قلعے کام نہیں آتے  یہ قانون دنیا کی تخلیق سے ہے اور ہمیشہ رہے گا۔ہر تدبیر تقدیر کےآگے بے بس ہے ہم پہلے تو تاریخ میں پڑھتے تھے اب کرونا وائرس کی شکل میں اپنی آنکھوں سے دیکھ چکے ہیں۔

میں اگر سوختہ سامان ہوں   تو یہ روز سیاہ 

خود دکھایا ہے میرے گھر کے چراغ نے

                                                                            ہم نے خود ہی اپنے ہاتھوں کی تباہی کی جب کام ہم غیر مسلموں کے کریں نظام یورپ کا لاگو کریں اور پھر کہیں تقدیر میں ہی یہ لکھا تھا ہم نے تو لاکھ کوشش کی یہ غلط ہے کہ کام تم کافروں والی کرو اور نصرت و تائید بدر و احد والی ہو جائے تو یہ طفلانہ خواہش ہے۔ ہم بدلتے ہیں تقدیر نہیں بدلتی۔

"فَلَنْ تَجِدَ لِسُنَّتِ اللّٰهِ تَبْدِيْلًا"

                                                                                                                            منبرومحراب کل بھی آواز دیتے رہے مساجد سے دعوت آتی رہی قرآن بلاتا رہا حدیث رسول پکارتی رہی ہمارا دین ہمیں  ٹوکتا رہا  مگر ہم نے سب کچھ پامال کیا پھر خود پامال ہوگئے۔سقوط ڈھاکہ کا سانحہ ظلم نہیں تھا بلکہ ہم نے خود تقدیرکو بھڑکایا۔خالق کائنات کا تو قانون ہے کہ!

"وَمَا ظَلَمُوْنَا وَلٰكِنْ كَانُوْٓا اَنْفُسَھُمْ يَظْلِمُوْن"

            اللہ تعالٰی عذاب کو ٹالتے ہیں اور ہم خود اس کو دعوت دیتے ہیں۔آج بھی ہم رقص و سرور کی محفلیں سجا نے میں مصروف ہیں تو معصومظلوم مسلمانوں کی سسکیاں کون سنے گا؟

                                                                                                                            اس قوم کو طوائفوں کے چکر میں نہ ڈالا جائے ان کی انگلیاں رب نے بندوق پر چلانے کے لیے بنائی ہیں گٹار بجانے کے لیے نہیں۔ہم کسی نئے سانحے سے بچنے کے لیے اسی نظریہ کی طرف لوٹنا ہوگا جس پر ہم قیام پاکستان کے لیے ایک ہوئے تھے آج پھر سے سوشلز،کمیونزم ،نیشنل ازم  اور اسی طرح صوبائیت و زبان کے تعصب انگڑائیاں لے رہے ہیں ہمیں بروقت ان کا راستہ  روکنا ہوگا اور نظریہ اسلام پر اکٹھا بھی ہونا ہے اور اللہ سے کیے وعدہ کو نفاذ اسلام کی صورت میں پورا کرنے کی ضرورت ہے۔بانی پاکستان قائد اعظم محمد علی جناح ؒ کے پاکستان کو بچانے کو بنانے کے لیے کتاب و سنت کو ہی تھامنا ہوگا۔اسی فرمان پر عمل پیرا ہونا ہوگا جو آپ نے 1943 ء میں کراچی کے ایک اجلاس میں فرمایا!

"                                                                                                                                           وہ کون سا رشتہ ہے جس میں منسلک ہونے سے تمام مسلمان جسد واحد کی طرح ہیں؟وہ کون سی چٹان ہے جس پر ان کی ملت کی عمارت استوار ہے؟وہ کون سا لنگر ہے جس سے اس امت کی کشتی محفوظ ہے؟وہ چٹان،لنگر خدا کی کتاب قرآن مجید ہے،مجھے یقین ہے کہ جوں جوں  ہم آگے بڑھتے جائیں گے ،ہم میں زیادہ اتحادہوگا،ایک خدا ،ایک رسولﷺ،ایک کتاب اور امت"۔